Тропарь, глас 8-й
Глубино́ю му́дрости человеколю́бно вся стро́яй и поле́зная всем подава́яй, Еди́не Соде́телю, упоко́й, Го́споди, ду́шу раба́ Твоего́ (или о многих: ду́ши раб Твои́х), на Тя бо упова́ние возложи́ (о многих: возложи́ша), Творца́ и Зижди́теля и Бо́га на́шего.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Тебе́ и сте́ну и приста́нище и́мамы, и Моли́твенницу благоприя́тну к Бо́гу, Его́же родила́ еси́, Богоро́дице Безневе́стная, ве́рных спасе́ние.
Тропари, глас 5-й
Припев: Благослове́н еси́, Го́споди, научи́ мя оправда́нием Твои́м.
Святы́х лик обре́те исто́чник жи́зни и две́рь ра́йскую, да обря́щу и аз путь покая́нием, поги́бшее овча́ аз есмь, воззови́ мя, Спа́се, и спаси́ мя.
Благослове́н еси́, Го́споди…
А́гнца Бо́жия пропове́давше, и закла́ни бы́вше я́коже а́гнцы, и к жи́зни нестаре́емей, святи́и, и присносу́щней преста́вльшеся, Того́ приле́жно, му́ченицы, моли́те долго́в разреше́ние нам дарова́ти.
Благослове́н еси́, Го́споди…
В путь у́зкий хо́ждшии приско́рбный, вси в житии́ крест я́ко яре́м взе́мшии, и Мне после́довавшии ве́рою, прииди́те, наслади́теся, и́хже угото́вах вам по́честей и венце́в небе́сных.
Благослове́н еси́, Го́споди…
О́браз есмь неизрече́нныя Твоея́ сла́вы, а́ще и я́звы ношу́ прегреше́ний; уще́дри Твое́ созда́ние, Влады́ко, и очи́сти Твои́м благоутро́бием, и вожделе́нное оте́чество пода́ждь ми, рая́ па́ки жи́теля мя сотворя́я.
Благослове́н еси́, Го́споди…
Дре́вле у́бо от не су́щих созда́вый мя, и о́бразом Твои́м Боже́ственным почты́й, преступле́нием же за́поведи па́ки мя возврати́вый в зе́млю, от нея́же взят бых, на е́же по подо́бию возведи́, дре́внею добро́тою возобрази́тися.
Благослове́н еси́, Го́споди…
Упоко́й, Бо́же, раба́ Твоего́ (о многих: рабы́ Твоя́), и учини́ его́ (о многих: я́) в раи́, иде́же ли́цы святы́х, Го́споди, и пра́ведницы сия́ют, я́ко свети́ла; усо́пшаго раба́ Твоего́ (о многих: усо́пшия рабы́ Твоя́) упоко́й, презира́я его́ (о многих: их) вся согреше́ния.
Сла́ва Отцу́ и Сы́ну и Свято́му Ду́ху.
Трисия́тельное Еди́наго Божества́ благоче́стно пое́м, вопию́ще: Свят еси́, О́тче Безнача́льный, Собезнача́льный Сы́не и Боже́ственный Ду́ше. Просвети́ нас, ве́рою Тебе́ служа́щих, и ве́чнаго огня́ исхити́.
И ны́не и при́сно и во ве́ки веко́в. Ами́нь.
Ра́дуйся, Чи́стая, Бо́га пло́тию ро́ждшая во спасе́ние всех, Е́юже род челове́ческий обре́те спасе́ние, Тобо́ю да обря́щем рай, Богоро́дице Чи́стая, Благослове́нная.
Аллилу́ия, аллилу́ия, аллилу́ия, сла́ва Тебе,́ Бо́же. (Трижды.)
Седален, глас 5-й
Поко́й, Спа́се наш, с пра́ведными раба́ Твоего́ (о многих: рабы́ Твоя́), и сего́ (о многих: сия́) всели́ во дворы́ Твоя́, я́коже есть пи́сано, презира́я, я́ко Благ, прегреше́ния его́ (о многих: их), во́льная и нево́льная, и вся я́же в ве́дении и не в ве́дении, Человеколю́бче.
Кондак, глас 8-й
Со святы́ми упоко́й, Христе́, ду́шу раба́ Твоего́ (о многих: ду́ши раб Твои́х), иде́же несть боле́знь, ни печа́ль, ни воздыха́ние, но жизнь безконе́чная.
Икос
Сам Еди́н еси́ Безсме́ртный, сотвори́вый и созда́вый челове́ка: земни́и у́бо от земли́ созда́хомся, и в зе́млю ту́южде по́йдем, я́коже повеле́л еси́, созда́вый мя и реки́й ми, я́ко земля́ еси́ и в зе́млю оты́деши, а́може вси челове́цы по́йдем, надгро́бное рыда́ние творя́ще песнь: аллилу́ия, аллилу́ия, аллилу́ия.
Тропари, глас 4-й
Со ду́хи пра́ведных сконча́вшихся ду́шу раба́ Твоего́ (о многих: ду́ши раб Твои́х), Спа́се, упоко́й, сохраня́я ю́ (о многих: их) во блаже́нней жи́зни, я́же у Тебе́, Человеколю́бче.
В поко́ищи Твое́м, Го́споди, иде́же вси святи́и Твои́ упокоева́ются, упоко́й и ду́шу раба́ Твоего́ (о многих: ду́ши раб Твои́х), я́ко еди́н еси́ Человеколю́бец.
Сла́ва Отцу́ и Сы́ну и Свято́му Ду́ху.
Ты еси́ Бог, соше́дый во ад и у́зы окова́нных разреши́вый, Сам и ду́шу раба́ Твоего́ (о многих: ду́ши раб Твои́х) упоко́й.
И ны́не и при́сно и во ве́ки веко́в. Ами́нь.
Еди́на Чи́стая и Непоро́чная Де́во, Бо́га без се́мене ро́ждшая, моли́ спасти́ся души́ его́ (о многих: душа́м их).
Русская Православная Церковь
Николаевский Собор
Авторское право © 2012-2024.
Разработчик: Капитула Ян
