Тропарь, глас 2
Всех скорбящих Радосте, и обидимых Заступнице, и алчущих Питательнице, странных утешение, обуреваемых пристанище, больных посещение, немощных покрове и Заступнице, жезле старости, Мати Бога Вышняго Ты еси, Пречистая: потщися, молимся, спастися рабом Твоим.
Молитва
Надеждо ненадежных, сило безпомощных, пристанище обуреваемых, покрове напаствуемых, заступление обидимых, Небесная манно, услаждающая алчущия, питие Небеснаго упокоения жаждущим, Мати Преблагословеннаго Бога, Преблагословенная и Пренепорочная Дево! К Тебе усердно прибегаем, к Твоему покрову вседушно колена преклоняем. Не презри убо плача и слез наших. Аще недостоинство наше и окаянство наших грехов нас ужасает, но уверяет нас целебоносный сей святый Твой образ, на немже благодать Твою и силу, яко неисчерпаемое море, видим, паки надеждою спасения ны исполняет. Вемы бо на месте сем слепыя прозревша, глухия прежде послежде слышаща, недугующия исцеление приимша, скорбящия утешены, вся по всякому прошению благоизобильствующа. На оных помилования бывшая взирающе, слепи суще душевныма очима и хроми душевными чувствы, ныне зде прибегохом. Просвети убо и исправи ны, Владычице: веси бо всякую нашу скорбь и всякую беду. Не презри молений наших, не возгнушайся нас грешных: вемы бо, яко вся можеши, елика волиши, о Преблагая наша надеждо и утешение! От юности нашея к Тебе привержени есмы: не остави убо нас, ниже отступи от нас ныне и присно и во веки веков. Аминь.
Русская Православная Церковь
Николаевский Собор
Авторское право © 2012-2024.
Разработчик: Капитула Ян
