Тропарь, глас 4
Добродетельми, яко лучами солнечными, просветила еси неверныя мудрецы, и, якоже пресветлая луна, ходящим в нощи неверия тьму отгнала еси, и царицу уверила еси, вкупе же и мучителя обличила еси, Богозванная невесто, блаженная Екатерино; желанием востекла еси в Небесный чертог, к прекрасному Жениху Христу, и от Него царским венцем венчалася еси. Емуже со Ангелы предстоящи, за ны молися, творящия пречестную память твою.
Молитва
О святая Екатерино, дево и мученице, истинная Христова невесто! Молим тя, яко нарочитую благодать, еюже предвари тя Жених твой, сладчайший Иисус, приимшую: якоже, посрамивши прельщения мучителя мудростию твоею, пятдесят витий победила еси, и напоивши их Небесным учением, ко свету истинныя веры наставила еси, тако испроси и нам оную Божию мудрость, да и мы, вся козни адскаго мучителя расторгше, мира же и плоти соблазны презревше, достойни явимся Божественныя славы, и к разширению святыя нашея Православныя веры сосуди достойни соделаемся, и с тобою в Небесней скинии Господа и Владыку нашего Иисуса Христа, со Отцем и Святым Духом, восхвалим и прославим во вся веки веков. Аминь.
Русская Православная Церковь
Николаевский Собор
Авторское право © 2012-2024.
Разработчик: Капитула Ян
