Тропа́рь, глас 8:
Ве́рою и благоче́стием измла́да воспита́н, до́брый па́стырь яви́ся пору́ченному ста́ду, во иере́ех му́ченик Твой, Го́споди, Константи́н, храм и прихо́д непоро́чны в руце́ Твое́й положи́: и́хже спаса́й всегда́ в ми́ре, моли́твами Богоро́дицы, Eди́не Человеколю́бче.
Конда́к, глас 6:
Блаже́н путь, и́мже ше́ствовал еси́, о́тче Константи́не, зва́нию своему́ досто́йно служе́ние соверша́я, от безбо́жных поруга́ние и смерть прия́л еси́, му́ченическим венце́м украси́вся и цельбоно́сными моща́ми освяти́в зе́млю По́лотскую, за град и лю́ди хода́тай ве́рен пребыва́еши; моли́ся Бо́гу о всех почита́ющих тя.
Велича́ние:
Велича́ем тя, святы́й священному́чениче Константи́не, и чтим честна́я страда́ния твоя́, я́же за Христа́ претерпе́л еси́.
Моли́тва
О священному́чениче о́тче Константи́не, ве́рный па́стырю ста́да Христо́ва и Це́ркве Белору́сския но́вый предста́телю! Ты в ве́ре и благоче́стии измла́да воспита́нный, путе́м ева́нгельским ше́ствовал еси́ и сподо́бился вели́каго служе́ния свяще́нническаго, его́же проходи́л еси́ со стра́хом Бо́жиим, благогове́нием и усе́рдием, я́ко му́дрый соверши́тель Та́ин Христо́вых, пропове́дник неле́ностный, наста́вник и врач духо́вный. Прихо́д, тебе́ пору́ченный, сохраня́л е́си от соблазни́телей ве́ка сего́ и, храм но́вый созда́, поуча́л еси́ па́ству устроя́ти ду́ши и телеса́ своя́ в жили́ще Свята́го Ду́ха. Наста́вшим гоне́нием от безбо́жных, не убоя́лся еси́ зло́бы сатани́нския, и, я́ко до́брый во́ин Христо́в, му́ки и смерть прия́л еси́. Сего́ ра́ди стяжа́вый дерзнове́ние пред Го́сподем, мо́лишися Ему́ неотсту́пно о спасе́нии ве́рных, вразумле́нии заблу́ждших, умягче́нии и обраще́нии злых. И нас, почита́ющих страда́ния твоя́, не оста́ви свои́м предста́тельством, да́руя вся поле́зная в ве́це сем, наипа́че же дости́гнути блаже́нства во Ца́рствии Небе́снем, иде́же с тобо́ю и все́ми святы́ми да сподо́бимся прославля́ти Отца́, и Сы́на, и Свята́го Ду́ха, во ве́ки веко́в. Ами́нь.
Русская Православная Церковь
Николаевский Собор
Авторское право © 2012-2024.
Разработчик: Капитула Ян
