Тропарь, глас 4-й
Уподо́бился еси́ купцу́, и́щущему до́браго би́сера, славнодержа́вный Влади́мире, на высоте́ стола́ седя́ ма́тере градо́в, богоспаса́емаго Ки́ева, испыту́я же и посыла́я к ца́рскому гра́ду уве́дети Правосла́вную ве́ру, и обре́л еси́ безце́нный би́сер Христа́, избра́вшего тя я́ко втора́го Па́вла, и отря́сшаго слепоту́ во святе́й купе́ли душе́вную, вку́пе и теле́сную: те́мже пра́зднуем твое́ успе́ние, лю́дие твои́ су́ще. Моли́ спасти́ся держа́вы твоея́ Росси́йския нача́льником и мно́жеству владо́мых.
Канон, глас 8-й
Песнь 1
Ирмос: Посе́ченный несеко́маго пресече́, и ви́де со́лнце зе́млю, ю́же не ви́де; лю́таго врага́ вода́ потопи́, и непроходи́мое про́йде Изра́иль. Песнь же воспева́шеся: Го́сподеви пои́м, сла́вно бо просла́вися.
Припев: Святы́й равноапо́стольный вели́кий кня́же Влади́мире, моли́ Бо́га о нас.
Собезнача́льное Сло́во Бо́жие, И́же дре́вле четыре́м стихи́ям Творе́ц, и те́ми весь мир сотвори́вый, свя́занную страстьми́ ду́шу мою́ разреши́, я́ко да воспою́, лику́я, сла́внаго кня́зя Васи́лия.
Слава: От выспрь соше́д, Влады́ко, невеще́ственно на духо́вную го́ру, свы́ше прося́щим от Тебе́ оби́льну све́тлость душа́м посли́, достодо́лжно похвали́ти чу́днаго кня́зя Васи́лия.
И ныне: Ма́терем и де́вам похвала́ Ты, Влады́чице, ро́ждшая Жизнь, Творца́ ми́рови, ма́терских же боле́зней не ощути́ла еси́, но Ма́ти у́бо и Де́ва пребыла́ еси́. Те́мже хва́ляще Тя, ра́дуйся, вопие́м Ти.
Песнь 3
Ирмос: Утверди́ся се́рдце мое́ во Го́споде, вознесе́ся рог мой в Бо́зе Спа́се мое́м, разшири́шася на враги́ моя́ уста́ моя́, возвесели́хся о спасе́нии Твое́м.
Святы́й равноапо́стольный вели́кий кня́же Влади́мире, моли́ Бо́га о нас.
Я́ко труба́ богогла́сная возгласи́ язы́к твой, блаже́нне, духо́вный, провозглаша́ющь всем конце́м земли́ Росси́йския Христо́во правове́рное Креще́ние, и́мже просвеще́н быв, мир весь просвети́л еси́.
Слава: Сия́ет днесь, Васи́лие, пресла́вная па́мять твоя́, ю́же пра́зднуют христоимени́тии лю́дие, тебе́ похваля́я, своего́ пра́отца, и́хже к све́ту разу́мному приве́л еси́.
И ныне: Сень зако́на пре́йде Рождество́м Твои́м, Богоро́дице, благода́ти прише́дши, О́тцу Сло́ву Христу́ Бо́гу на́шему: Его́же позна́в, сла́вный князь, це́рковь твою́ све́тло украси́л есть.
Го́споди, поми́луй.
Го́споди, поми́луй.
Го́споди, поми́луй.
Седален, глас 2-й
В моли́твах бдяй при́сно ра́достною душе́ю, Васи́лие, того́ ра́ди поче́рпл еси́ Ду́ха прему́дрости от исто́чника, сходя́щаго свы́ше. Тем ве́рою просия́в я́ко со́лнце, моля́ся Христу́ непреста́нно: ускори́ Ще́дрый, и потщи́ся спасти́ от прегреше́ний мир.
Слава и ныне: Богоро́дице безневе́стная Чи́стая, Я́же без се́мене ро́ждшая всех Влады́ку, Того́ со А́нгелы моли́ изба́витися нам от вся́каго недоуме́ния, и да́ти умиле́ние и свет душа́м на́шим, и согреше́ний очище́ние, Я́же еди́на вско́ре заступа́ющи.
Песнь 4
Ирмос: Проро́к Авваку́м у́мныма очи́ма прови́де, Го́споди, прише́ствие Твое́, тем и вопия́ше: от ю́га прии́дет Бог. Сла́ва си́ле Твое́й, сла́ва снизхожде́нию Твоему́.
Святы́й равноапо́стольный вели́кий кня́же Влади́мире, моли́ Бо́га о нас.
Све́тло бысть и сла́дко по о́блаце, и́мже покрыва́шеся небе́сное со́лнце, весела́ же и ра́достна весна́ по зи́мней ско́рби: ты же по о́блаце и́дольскаго мра́ка Креще́нием, я́ко со́лнце све́тлое, возсия́л еси́ нам, Васи́лие.
Слава: Па́вел фарисе́й, к Дама́ску гряды́й, ма́лым блеща́нием вели́каго све́та ослепле́н, Креще́нием же просвети́ся: ему́же ты подобник был еси́, сла́вне, Ко́рсуня доше́л, очны́й мрак отгна́л еси́.
И ныне: Тя яви́лася еси́, Де́во, ко́рень ненапое́н, прозяба́я отпуще́ние, плод светоно́сный ро́ждши Христа́ Бо́га на́шего: дряхле́ющую страстьми́ ду́шу мою́ просвети́ и испроси́ грехо́в оставле́ние.
Песнь 5
Ирмос: Го́споди Бо́же наш, мир даждь нам, Го́споди Бо́же наш, стяжи́ ны, Го́споди, ра́зве Тебе́ ино́го не ве́мы, имя Твое́ имену́ем.
Святы́й равноапо́стольный вели́кий кня́же Влади́мире, моли́ Бо́га о нас.
Ра́дуйся и красу́йся ду́хом, Росси́йский царю́ Васи́лие, изря́дныя бо ве́тви Богоса́дныя ко Христу́ прине́сл еси́, Богоизря́дный твой плод, Бори́са сла́внаго и Гле́ба благочести́ваго: с ни́миже предстоя́ Христу́, о нас моли́ся.
Слава: Ди́вный прорече́ Иса́ия на Иерусали́м: бу́дет я́ве гора́ Госпо́дня, и дом на верх гор. Пра́ведне же на тебе́ разуме́хом благода́ть Ду́ха: дом бо Влады́це созда́л еси́ на версе́х гор.
И ныне: Пропове́дует о тебе́ чу́дный Иса́ия Ду́хом, Де́вою хотя́щу роди́ти Христа́ без се́мене: Дави́д же, Твой пра́дед, ди́вно провозвести́ Твоя́ вели́чествия: спасе́ бо нас я́ко ми́лостив.
Песнь 6
Ирмос: Я́ко во́ды морски́я, Человеколю́бие, волна́ми жите́йскими обурева́юся. Те́мже, я́ко Ио́на, та́ко вопию́ Ти: возведи́ от тли живо́т мой, благоутро́бне Го́споди.
Святы́й равноапо́стольный вели́кий кня́же Влади́мире, моли́ Бо́га о нас.
Благоче́стия ревни́тель сла́внаго царя́ Константи́на ты был еси́, Васи́лие, просвети́вшаго креще́нием е́ллинский род: ты же духо́вною ба́нею лю́ди твоя́ пресве́тло обнови́л еси́.
Слава: Услади́в любо́вию Христо́вою ду́шу и разу́мныя прие́м криле́, прелете́л еси́ и́дольский мрак и разгна́л еси́ тму злове́рия, блаже́нне, всели́вся в черто́г Спа́са всех Бо́га.
И ныне: Благоду́шствует Це́рковь Росси́йская днесь, и правове́рных собо́ри, в па́мять пресве́тлую Васи́лия ублажа́юще твое́ безсе́менное Рождество́, Де́во, и приле́жно Сы́ну Твоему́, моля́щеся, зову́т: Тя велича́ем.
Го́споди, поми́луй. Го́споди, поми́луй. Го́споди, поми́луй. Слава, и ныне:
Кондак, глас 8-й
Подо́бствовав вели́кому Апо́столу Па́влу в седи́нах, всесла́вне Влади́мире, вся, я́ко младе́нческая мудрова́ния, и́же о и́долех тща́ния оста́вль, я́ко муж соверше́нный, украси́лся еси́ Боже́ственнаго креще́ния багряни́цею: и ны́не Спа́су Христу́ в весе́лии предстоя́, моли́ спасти́ся держа́вы Росси́йския нача́льником и мно́жеству владо́мых.
Икос
Просвети́вый дре́вле Изра́иля Моисе́йским зако́ном, просвети́л же еси́ мир явле́нием Твоего́ Прише́ствия, Христе́ Бо́же, Богогла́сныя твоя́ ученики́ посла́л еси́ пропове́дати по стра́нам е́же от Де́вы безсе́менное рождество́ Твое́ и тем повеле́л еси́ крести́ти во и́мя Отца́, и Сы́на, и Свята́го Ду́ха. Обветша́вшу же ви́дя страну́ Росси́йскую грехо́м, Дух Твой посла́л еси́ в крепкоразу́мнаго ду́шу сла́внаго Влади́мира, позна́ти Тебе́ Еди́наго от Тро́ицы Христа́ Бо́га и Твои́м креще́нием просвети́ти избра́нныя Твоя́ и от Тебе́ поруче́нныя ему́ лю́ди и привести́ к Тебе́ ве́рою вопию́щия: изба́ви Твое́ достоя́ние от сопроти́вных пога́н, Росси́йский нача́льники и мно́жество владо́мых.
Песнь 7
Ирмос: Халде́йския пе́щи всепа́губную си́лу угаси́вше о́бразом А́нгела снизше́дшаго, Зижди́телю ю́ноши взыва́ху: благослове́н еси́ и хва́льный, Бо́же оте́ц на́ших.
Святы́й равноапо́стольный вели́кий кня́же Влади́мире, моли́ Бо́га о нас.
Прао́тчи богоистка́нныя мя ри́зы враг душегу́бец обнажи́л есть: Иису́с же безнача́льный явле́йся пло́тию, очи́стив водо́ю Ду́ха, па́ки мне подаде́ ю, Его́же позна́в, сла́вне Влади́мире, весели́шися, вопия́: благослове́н Бог оте́ц на́ших.
Слава: Моисе́йский сохрани́в зако́н, Дании́л Боговиде́ния сподо́бися: прао́теческия же ты попра́в и́долы, не я́ко во мра́це, но в бо́льшей сла́ве разу́мно узре́л еси́ Христа́ со Отце́м и Ду́хом, Креще́нием же просвеще́н, весели́шися, вопия́: благослове́н Бог оте́ц на́ших.
И ныне: Боже́ственный обнажи́ оде́жды, враг прельсти́в первозда́ннаго пра́деда Твоего́, Де́во, из боку́ же Твое́ю Чи́стою и Неискусобра́чною прише́д Спас Сла́дкий мой Иису́с, на Него́же поте́к, а́ки на Ада́ма, но о Бо́га образи́ся и сокруши́ся лю́те. Мы же Сы́ну Твоему́ зове́м: благослове́н Бог оте́ц на́ших.
Песнь 8
Ирмос: Покрыва́яй вода́ми превы́спренняя Своя́, полага́яй мо́рю преде́л песо́к и содержа́й вся, Тя пое́т со́лнце, Тя сла́вит луна́, Тебе́ прино́сит песнь вся тварь, яко Соде́телю всех во ве́ки.
Святы́й равноапо́стольный вели́кий кня́же Влади́мире, моли́ Бо́га о нас.
Род пра́ведных благослови́тся, Боже́ственныя веща́ша уста́, е́же на тебе́ сбы́стся, блаже́нне: се́мя бо святоле́пное и Богоизбра́нное прине́сл еси́ Христу́, непобеди́мыя му́ченики, и́миже просвети́л еси́ зе́млю Росси́йскую. И́хже похваля́юще с тобо́ю, превозно́сим Христа́ во ве́ки.
Слава: Ма́ти всех гра́дов вои́стинну ца́рства твоего́ град яви́ся Ки́ев, в не́мже Христо́с пре́жде со Отце́м и Ду́хом просла́вися, твое́ю прама́терию и тобо́ю, блаже́нне, иде́же му́жественное твое́ те́ло лежи́т све́тло в це́ркви Влады́чицы: мы же лю́дие твои́, хва́ляще, пое́м Христа́ во веки.
И ныне: Безнача́льное сия́ние и Сло́во О́тчее пропове́даша нело́жно проро́честии гла́сы, из Тебе́ хотя́щаго без тли роди́тися Емману́ила, Бо́га же и челове́ка, кре́пкое язы́ков ча́яние, Ему́же, я́ко Ма́ти, моли́ся спасти́ся нам.
Песнь 9
Ирмос: Ужасе́ся о сем не́бо и земли́ удиви́шася концы́, я́ко Бог яви́ся челове́ком пло́тски и чре́во Твое́ бысть простра́ннейшее небе́с. Тем Тя, Богоро́дицу, А́нгелов и челове́к чинонача́лия велича́ют.
Святы́й равноапо́стольный вели́кий кня́же Влади́мире, моли́ Бо́га о нас.
Дави́д обре́теся пре́жде Изра́илю держа́вный царь и лю́ди спасе́, бо́ги иноязы́чныя низложи́в, Ду́хом Бо́жия Сы́на пропове́да: ты же в Тро́ице позна́л еси́ Бо́га, блаже́нне Васи́лие, Его́же велича́ем.
Слава: Да торжеству́ют днесь ве́село па́мять твою́ святоле́пно в це́ркви Бо́жия Ма́тере богоизбра́ннии лю́дие, ю́же любе́зно украси́л еси́, в па́мять ве́чную твоего́ преставле́ния, не́бо земно́е: в не́йже почива́я, ожида́еши всестра́шныя трубы́ Арха́нгеловы, блаже́нне. Тем тя при́сно велича́ем.
И ныне: Ду́хом Бо́жественным распаля́еми вси ро́ди, любо́вию блажи́м Тя, Богоро́дице: Ты бо кля́тву прама́тере разруши́ла еси́. Приле́жно же пое́м Бо́жия Сло́ва: Того́ бо неопа́льно во чре́ве Твое́м прие́мши, родила́ еси́ пло́тию. К Нему́же моли́ся изба́витися ве́рному Твоему́ ста́ду от вся́кия ну́жды и печа́ли.
Русская Православная Церковь
Николаевский Собор
Авторское право © 2012-2024.
Разработчик: Капитула Ян
